Formación impartida por EAPN Galicia, Rede Europea de Loita contra a Pobreza e a Exclusión Social, e algunhas das súas entidades membro, que traballan con distintos grupos sociais en risco ou situación de pobreza ou exclusión social.

EAPN Galicia, é unha federación que agrupa a máis de 30 organizacións do Terceiro Sector Social galego, implicadas na loita contra a pobreza, a exclusión social e a desigualdade social e de xénero, sendo a maior rede de entidades sociais de Galicia.

Ao longo dunha hora e media, o alumnado poderá coñecer de primeira man que é o Terceiro Sector de Acción Social, cal é o seu papel na defensa dos dereitos e a inclusión social, e que tipo de entidades o conforman. Tamén se explicará que é EAPN Galicia, como traballa e cales son as súas liñas de acción. A través das experiencias das entidades participantes, mostrarase a realidade diaria do traballo no Terceiro Sector, os perfís profesionais máis demandados, competencias requeridas, e as oportunidades de colaboración e emprego que ofrece este ámbito.

Os representates de EAPN Galicia que participarán serán:

• Nerea Rivero, responsable de investigación e incidencia vivenda e xénero en EAPN Galicia
• Xosé Cuns, director de EAPN Galicia-Rede Europea contra a Pobreza e a Exclusión Social

A eles uniranse tamén representantes de entidades que forman parte desta organización.

A sesión será dinámica, combinando explicacións, exemplos prácticos e espazos para preguntas e interacción co alumnado, e contará co seguinte programa:

1. Organizacións Non Gubernamentais (ONG)
2. Que é o Terceiro Sector de Acción Social (TSAS).
3. EAPN Galicia: quen somos?
4. Competencias para traballar en EAPN Galicia.
5. Intervención das entidades membro: experiencia práctica e perfís profesionais.

Obxectivos da formación:

1. Dar a coñecer que é o Terceiro Sector de Acción Social, as súas funcións, principios e papel fundamental na defensa dos dereitos e na loita contra a exclusión social.
2. Visibilizar o labor de EAPN Galicia e as súas entidades membro.
3. Explorar as oportunidades profesionais que ofrece o Terceiro Sector, dando a coñecer os perfís máis demandados e as competencias necesarias para traballar neste ámbito.