Webinar de unha hora de duración no que se abordarán cuestións clave sobre o papel dos colexios profesionais, a empregabilidade, a formación continua e a defensa da profesión. Ademias será a ocasión perfecta para resolver dúbidas, coñecer recursos e descubrir como un colexio profesional pode ser un aliado estratéxico no inicio e desenvolvemento da túa carreira profesional.

Este webinar vai a ser impartido pola Unión Profesional de Galicia, unha entidade que aglutina e representa 46 colexios profesionais de distintas áreas e ámbitos territoriais da comunidade autónoma, actuando como voz conxunta das profesións colexiadas. O seu labor céntrase en defender o exercicio profesional, promover a calidade dos servizos á cidadanía, impulsar a formación continua, fomentar a cooperación intercolexial e reforzar o papel das profesións na sociedade galega. Ademais, funciona como espazo de encontro, diálogo e coordinación entre colexios, administracións e axentes sociais.

Concretamente, a sesión será levada a cabo por:

1.- José María Suárez Quintanilla: Presidente da Unión Profesional de Galicia e do Colexio de Odontólogos de A Coruña.
2.- María del Carmen González Hermo: Vicesecretaria do Colexio de Psicólogos de Galicia.
3.- Patricia Vérez Cotelo: Secretaria Xeral da Unión Profesional de Galicia, Presidenta do Colexio de Axentes da Propiedade Inmobiliaria de A Coruña e do Consello Galego de Colexios de Axentes da Propiedad Inmobiliaria.

Este encontro pretende ofrecer unha visión práctica e actualizada sobre como os colexios profesionais poden acompañar, orientar e fortalecer a traxectoria das persoas que comezan a súa carreira:

1. O rol do colexio no inicio da carreira profesional

Durante o webinar analizarase:

• Que é un Colexio Profesional, cales son os seus fins e como se estrutura internamente.
• Os servizos específicos para persoas recentemente graduadas ou tituladas.
• A percepción da colexiación como trámite fronte ao seu valor engadido real: apoio profesional, garantías, representación e acceso a recursos clave.
• A obrigatoriedade ou non de colexiarse segundo a profesión, e cando é recomendable facelo.
• Información sobre cotas reducidas ou bonificadas.
• Que ocorre cando unha persoa está colexiada nun territorio pero exerce noutro: é necesario volver a colexiarse?

2. Empregabilidade e mercado laboral

O encontro tamén afondará nas oportunidades profesionais e nos recursos que ofrecen os colexios:

• Existencia de bolsas de emprego específicas ou convenios con empresas e entidades do sector en Galicia.
• Posibilidade de acceder a prácticas profesionais para persoas recentemente tituladas.
• As competencias máis demandadas actualmente polas empresas, tanto técnicas como soft skills.
• A evolución do traballo por conta propia e as perspectivas de futuro para o emprendemento profesional.

3. Formación continua e especialización

Outro dos eixos fundamentais será a actualización profesional:

• Tipos de formación especializada que ofrecen os colexios e que non adoitan estar dispoñibles noutros espazos formativos.
• Mecanismos para manterse ao día ante cambios normativos, tecnolóxicos ou metodolóxicos que afectan ao exercicio profesional.

4. Networking e comunidade profesional

A sesión explicará como os colexios contribúen a crear comunidade:

• Eventos, encontros e espazos de networking para conectar con outros/as profesionais e xerar sinerxías.
• Iniciativas que facilitan o contacto con profesionais doutras disciplinas, favorecendo proxectos multidisciplinares e colaboracións.

5. Deontoloxía, ética e defensa profesional

Por último, abordarase o papel dos colexios na protección e defensa da profesión:

• Dereitos e obrigas das persoas colexiadas.
• Servizos de apoio xurídico ante situacións de precariedade laboral, dúbidas contractuais ou conflitos profesionais.
• A importancia do Seguro de Responsabilidade Civil e como se xestiona para novos/as profesionais.
• O peso dos colexios profesionais nas relacións coa administración e na elaboración de normativas, leis e regulamentos que afectan ao sector.